Torna la nostra meravigliosa poeta Maria Valenza, con una delicatissima ode in vernacolo pantesco, dedicata al dammuso

Si metti pedi a Pantiddraria
vidi tanti DAMMUSA pi la via.
Di chisti antichi abitazioni
si nnamuraru ghenti di tutti li nazioni,
tantu chi cuntinuaru li custruzioni
puru li novi ghinirazioni.
Lu DAMMUSU era lu “locu”,
unni stannu famigghi, animali e posti di iocu.
Fattu di petra lavica, terra, rina, quascina e pizzulana,
cu li tettira a cupula pi cogghiri l’acqua chiuvana;
c’era almenu una ISTERNA cu l’acqua pi viviri, lavari e n’un gniri a la “funtana”.
Spissu, un PASSIATURI lu “dammusu” nturniava ,
c’una DUCCHENA unni mmarazzi si ppuiava e quarcunu cu li patruna si ssittava e cunvirsava.
C’ era un STINNITURI, c’un furniddru e una “quadara”,
pi mmugghiari la rascina cu li coppa e stennila para, para.
C’era un’ AIRA, unni lu sceccu o lu mulu ghirava,
mentri lu viddranu cu la pala spagghiava:
l’ oiru o lu furmentu
chi pi tutti era un bon nutrimentu.
C’era una PILA DI PETRA a la isterna viscina
pi lavari li robbi, la lana e macari la “cutra-scina”.
C’era lu IARDINU e lu VAGNANU,
p’ aviri frutta e virdura a purtata di manu.
E, pi cumpritari lu “dammusu”,
di li lochira pi l’animali si fascia usu.
C ‘era la STADDRA di lu sceccu, di lu mulu, di la vacca e di lu viteddru;
lu SARDUNI pi la crapa e lu sciavareddru;
lu GADDRINARU pi li gaddrini e lu ZACCHINU pi lu purceddru;

lu MACASENU DI LU VINU, di tanti cosi era scinu cu:
palamentu , palaturi, trappitu, vutti e tina,
mmuta, sciasca, mpagghiati, criva, vallirotta, panara e cuffina.
C’era lu MACASENU DI LI SCIAPPIRI, cu: panara e panareddra
vaschi di scimentu, statia, tini, sacca di sali di cananavazzeddra.
L’ OCCHI D’ARCHETTI sci putì truvari ntà lu fora di dri dammuseddri,
dunni si riparannu, iucannu e si ripusannu pioccitteddri e vicciareddri.
La porta di lu “dammusu” era zingata,
cu lu purteddru chi la naticcia e la succula tinia firmata.
Ntà la trasuta, truvavi subbitu la cuscina cu lu furnu a ligna e lu cuffulalru sempre dumatu
pi cosciri e aviri lu locu quadiatu.
Ntà li latira, una CASENA sci putì truvari,
pi teneri frischi e sarvari li cosi di manciari.
Lu STIPU A MURU un’putia mai mancari,
pi pignati, cazzalora, quadaruna, piatta, bicchieri e pusati risittari.
Po’ c’era puru la SARDETTA ,
fatta ad avutu ntà un’archetta.
C’ernu li porta di li spercia, pi trasiri ntà l’autri stanzi;
prima ntà la sala, dunni si fascinnu li granni pranzi,
cu: stipa a mura, una tavula, una vitrina e lu sufa’
pi risciviri ghentI in gran quantità.
Po’ c’era la CAMMIRA cu l’ARCOVA e lu CAMMARINEDDRU,
unni durminnu: patri, matri e macari chiù d’un picciutteddru.
Chisti ernu li lochira di l’ anticu “dammusu”
chi nunnè ancora fora usu,
anzi, esti tantu cunsidiratu,
e ntà tuttu lu munnu è apprizzatu e numinatu.

L’autrice
Maria Valenza